इचलकरंजी (कोल्हापूर) : डिजिटल अरेस्टच्या काल्पनिक भीतीचा गैरफायदा घेत अनोळखी इसमांनी एका ७९ वर्षीय वृद्धाची तब्बल ५४ लाख ८५ हजार ६२४ रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी गावभाग पोलिस ठाण्यात दोन अनोळखी व्यक्तींच्याविरोधात गुन्हा दाखल करण्यात आला आहे. फिर्याद अण्णासो व्हनगोंडा पाटील (वय 79, रा. टाकवडे वेस) यांनी दिली आहे.
टाकवडे वेस येथे राहणारे पाटील यांना ७ ते २० नोव्हेंबर या कालावधीत विविध मोबाईल नंबरवरून वारंवार फोन आले.
फोन करणाऱ्या व्यक्तींनी स्वतःला सरकारी अधिकारी/बँक अधिकारी म्हणून सांगत भीतीदायक माहिती दिली—
पाटील यांच्या आधार कार्डचा वापर करून मुंबईतील कॅनरा बँकेतून कोट्यवधी रुपयांचे कर्ज काढण्यात आले आहे.
त्यातून 20 टक्के कमिशन पाटील यांच्या नावावर जमा झाल्याचे सांगून त्यांना गुन्ह्यात अडकवण्याची धमकी दिली.
हे प्रकरण केवळ महाराष्ट्रातच नव्हे तर अनेक राज्यांत घडले असून मोठ्या रॅकेटचा तपास सुरू आहे, असे सांगत पाटील यांना चौकशीसाठी सहकार्य करावे असा विश्वास बसवण्यात आला.
पुढील चौकशीसाठी तुमची बँक खाती सुरक्षित ठेवावी लागतील, नाहीतर ‘डिजिटल अरेस्ट’ होऊ शकतो, अशी भीती निर्माण करून त्यांनी वृद्धाकडून विविध व्यवहार करवून घेतले.
या दबावाखाली आणि धमकीखाली पाटील यांनी सांगितलेल्या खात्यांमध्ये व्यवहार केले. नंतर त्यांना संशय येताच त्यांनी पोलिसांत धाव घेतली.
गावभाग पोलिसांनी पाटील यांची फिर्याद नोंदवून अज्ञात कॉलर्सविरोधात फौजदारी गुन्हा दाखल केला असून, कॉल रेकॉर्ड, व्यवहार तपशील आणि संबंधित खात्यांचा शोध घेण्याचे काम सुरू केले आहे. सायबर सेलचीही मदत घेतली जात आहे.
गेल्या काही महिन्यांपासून देशभरात "डिजिटल अरेस्ट" नावाने अनेक फसवणुका सुरू आहेत.
फसवे कॉलर्स स्वतःला—
पोलिस अधिकारी
सायबर क्राईम विभागाचे अधिकारी
रिझर्व्ह बँक/बँकेचे अधिकारी
असे म्हणून व्यक्तींना आधार, पॅन, बँक खात्यांचा गैरवापर झाल्याचे सांगतात आणि भीती पसरवतात. यानंतर “तुम्हाला ताब्यात घेतले जाईल”, “तुमचे खाते गोठवले जातील” अशा धमक्या देत मोठ्या रकमा उकळतात.
कोणत्याही सरकारी विभागाकडून फोनवर कधीच आर्थिक व्यवहार करण्यास सांगितले जात नाही.
अनोळखी नंबरवरून आलेल्या धमकीच्या कॉल्सकडे दुर्लक्ष करा.
व्हिडिओ KYC / खाते / तपासासाठी पैसे मागितले तर त्वरित कॉल कट करा.
अशा प्रकारचा कॉल आल्यास लगेच 1930 सायबर क्राईम हेल्पलाईन वर संपर्क साधा.
स्वतः फसवणूक झाल्यास 24 तासांत तक्रार देणे अत्यंत महत्त्वाचे आहे.
इचलकरंजीतील या प्रकरणातून पुन्हा एकदा स्पष्ट होते की सायबर गुन्हेगार वृद्ध आणि एकटे असलेल्या व्यक्तींना सहज गाठतात आणि सरकारी अधिकाऱ्यांचे रूप धारण करून भीती दाखवून मोठ्या रकमेची फसवणूक करतात. पोलिसांनी नागरिकांना सतर्क राहण्याचे आवाहन केले आहे.
