पुणे : सायबर भामट्यांनी पुण्यातील एका ज्येष्ठ नागरिकाला जाळ्यात ओढून 'डिजिटल अरेस्ट'च्या नावाखाली तब्बल १० कोटी ७४ लाख रुपयांचा गंडा घातल्याची खळबळजनक घटना उघडकीस आली आहे. याप्रकरणी पुणे सायबर पोलिसांच्या पथकाने धडक कारवाई करत प्रसिद्ध रीलस्टार रोहन जाधवला बेड्या ठोकल्या आहेत. या संपूर्ण टोळीने राज्यभरात आणि देशभरात केलेले तब्बल २९ गुन्हे तपासात उघड झाले असून, या कारवाईमुळे सायबर गुन्हेगारांचे मोठे नेटवर्क उद्ध्वस्त करण्यात पोलिसांना यश आले आहे.
काय आहे नेमके प्रकरण?
पुण्यातील एका ज्येष्ठ नागरिकाला काही दिवसांपूर्वी एक अज्ञात फोन आला. संभाषण करणाऱ्या भामट्याने स्वतःची ओळख 'केंद्रीय अन्वेषण विभाग' (CBI) अधिकारी म्हणून करून दिली. "तुमचे बँक खाते एका गंभीर गुन्ह्यात आणि बेकायदेशीर आर्थिक व्यवहारांसाठी वापरण्यात आले आहे. या प्रकरणी तुमच्यावर अटकेची कारवाई होऊ शकते," अशी धमकी देत या भामट्याने ज्येष्ठाच्या मनात तीव्र भीती निर्माण केली.
अटक टाळायची असेल, तर तपासाच्या नावाखाली बँक खात्यातील रक्कम वेगवेगळ्या खात्यांवर वर्ग करावी लागेल, असा बनाव रचण्यात आला. डिजिटल अरेस्टच्या भीतीखाली आलेल्या या ज्येष्ठाने घाबरून भामट्यांनी सांगितलेल्या विविध बँक खात्यांमध्ये एकूण १० कोटी ७४ लाख रुपये टप्प्याटप्प्याने वर्ग केले. फसवणूक झाल्याचे लक्षात आल्यानंतर पीडित ज्येष्ठाने त्वरित पुणे सायबर पोलिसांकडे धाव घेत तक्रार नोंदवली.
reel च्या दुनियेतील स्टार, पण प्रत्यक्षात गुन्हेगार!
सायबर पोलिसांनी तांत्रिक विश्लेषण आणि बँक खात्यांच्या व्यवहारांचा मागोवा घेत तपासाची चक्रे वेगाने फिरवली. या तपासातून छत्रपती संभाजीनगर येथील रहिवासी असलेला आणि सोशल मीडियावर प्रचंड लोकप्रिय असलेला रीलस्टार रोहन जाधव याचे नाव समोर आले. पोलिसांनी सापळा रचून त्याला ताब्यात घेतले. रोहन हा बी.एस्सी. शिक्षित असून, रीलच्या माध्यमातून मिळालेल्या लोकप्रियतेच्या आड तो सायबर फसवणुकीच्या या मोठ्या जाळ्यात सक्रिय भागीदार म्हणून काम करत असल्याचे निष्पन्न झाले आहे.
या प्रकरणात पोलिसांनी रोहन जाधव याच्या आधीच हर्षद धनतोले, समर्थ देशमुख, अमर अत्तरगी आणि प्रणव आर्या या चार आरोपींना अटक केली होती. ही टोळी मुख्य सूत्रधाराच्या सांगण्यावरून लोकांची फसवणूक करणे, बँक खाती पुरवणे आणि लुटलेली रक्कम वेगवेगळ्या खात्यांवर वळवणे ही कामे करत होती.
अटक करण्यात आलेल्या आरोपींची चौकशी केली असता, या टोळीने अशाच प्रकारच्या भीतीचा वापर करून केलेले तब्बल २९ सायबर गुन्हे उघडकीस आले आहेत. हे आंतरराज्यीय नेटवर्क असण्याची शक्यता असून, सायबर पोलीस आता या टोळीच्या मुख्य सूत्रधाराचा आणि पैशांच्या अंतिम व्यवहारांचा कसून शोध घेत आहेत.
दरम्यान, "कोणतीही शासकीय संस्था, पोलीस किंवा सीबीआय अधिकारी फोनवर/व्हिडिओ कॉलवर 'डिजिटल अरेस्ट' करत नाहीत," असे स्पष्ट करत, अशा कोणत्याही संशयास्पद फोनला बळी न पडण्याचे आणि तातडीने १९३० या सायबर हेल्पलाइनवर संपर्क साधण्याचे आवाहन पुणे सायबर पोलिसांकडून करण्यात आले आहे.
