क्रेडिट कार्ड रद्द करण्याचा निर्णय तुमच्या आर्थिक भविष्यासाठी महागात पडू शकतो.

अनेकजण महिनोनमहिने किंवा वर्षानुवर्षे न वापरलेले क्रेडिट कार्ड वार्षिक शुल्क, कमी झालेले रिवॉर्ड्स किंवा गरज नसल्यामुळे बंद करण्याचा निर्णय घेतात. मात्र, आर्थिक तज्ज्ञांच्या मते, क्रेडिट कार्ड बंद करण्यापूर्वी त्याचा आपल्या क्रेडिट स्कोअर आणि भविष्यातील कर्जपात्रतेवर होणारा परिणाम समजून घेणे आवश्यक आहे.

उपलब्ध क्रेडिट मर्यादा कमी होऊ शकते

क्रेडिट कार्ड बंद केल्यास तुमची एकूण उपलब्ध क्रेडिट मर्यादा कमी होते. त्यामुळे पूर्वीइतकाच खर्च केला तरी उपलब्ध मर्यादेच्या तुलनेत क्रेडिट वापराचे प्रमाण (Credit Utilisation Ratio) वाढू शकते. जास्त क्रेडिट वापराचा परिणाम क्रेडिट प्रोफाइलवर होण्याची शक्यता असते.

जुने कार्ड बंद करणे नेहमीच योग्य ठरत नाही

सर्वात जुने क्रेडिट कार्ड कमी वापरात असले तरी ते तुमच्या दीर्घकालीन क्रेडिट इतिहासाचा महत्त्वाचा भाग असते. क्रेडिट ब्युरो कर्जपात्रतेचे मूल्यांकन करताना खात्यांचा कालावधीही विचारात घेतात. त्यामुळे जुने खाते बंद केल्यास तुमच्या क्रेडिट इतिहासावर परिणाम होऊ शकतो.

प्रत्येक कार्ड कायम ठेवणेही आवश्यक नाही

जर एखाद्या कार्डावर जास्त वार्षिक शुल्क आकारले जात असेल, त्यातून विशेष लाभ मिळत नसतील किंवा ते अनावश्यक खर्चाला प्रोत्साहन देत असेल, तर ते बंद करणे योग्य ठरू शकते. विशेषतः ज्यांचे क्रेडिट प्रोफाइल मजबूत आहे आणि अनेक सक्रिय क्रेडिट खाती आहेत, त्यांच्यावर त्याचा परिणाम तुलनेने कमी होऊ शकतो.

कार्ड बंद करण्यापूर्वी ही कामे पूर्ण करा

क्रेडिट कार्ड बंद करण्याची विनंती करण्यापूर्वी खालील बाबींची खात्री करून घ्या.

• सर्व थकबाकी पूर्णपणे भरली आहे.

• प्रलंबित व्यवहार पूर्ण झाले आहेत.

• उपलब्ध रिवॉर्ड पॉइंट्स किंवा कॅशबॅकचा वापर केला आहे.

• कार्डशी जोडलेली सर्व Recurring Payments इतर कार्ड किंवा खात्यावर हलवली आहेत.

• कार्ड बंद झाल्यानंतर क्रेडिट रिपोर्टमध्ये खाते योग्यरित्या "Closed" म्हणून नोंद झाले आहे, याची पडताळणी करा.

चांगला क्रेडिट स्कोअर कसा टिकवायचा?

तज्ज्ञांच्या मते, केवळ एक कार्ड बंद केल्यानेच क्रेडिट स्कोअर ठरत नाही. वेळेवर कर्ज व कार्ड बिलांचे पेमेंट, मर्यादित कर्जाचा वापर आणि जबाबदारीने आर्थिक व्यवहार करणे हे चांगला क्रेडिट स्कोअर राखण्यासाठी अधिक महत्त्वाचे असते.