रिझर्व्ह बँकेने फेटाळल्या ‘सोने विक्री’च्या अफवा : सोन्याचा साठा ८८०.५२ टन इतकाच कायम

मुंबई : भारतीय रिझर्व्ह बँकेने (RBI) माध्यमांमध्ये प्रसिद्ध झालेल्या “रिझर्व्ह बँकेने सोने विकले” या बातम्यांचे खंडन केले आहे. रिझर्व्ह बँकेने स्पष्ट केले की,अशा प्रकारच्या बातम्या चुकीच्या असून बँकेच्या सोन्याच्या साठ्यात कोणताही बदल झालेला नाही.

३ जून २०२६ रोजी प्रसिद्ध करण्यात आलेल्या निवेदनात रिझर्व्ह बँकेने म्हटले आहे की, बँकेच्या मासिक बुलेटिनमध्ये सोन्याच्या भौतिक साठ्याची माहिती नियमितपणे प्रसिद्ध केली जाते. सध्या रिझर्व्ह बँकेकडे असलेला सोन्याचा भौतिक साठा ८८०.५२ टन इतकाच कायम आहे.

रिझर्व्ह बँकेने नागरिकांना अशा संवेदनशील विषयांमध्ये केवळ अधिकृत माहितीलाच विश्वास ठेवण्याचे आवाहन केले आहे. तसेच सोशल मीडिया किंवा अप्रमाणित माध्यमांमधून पसरवल्या जाणाऱ्या अफवांपासून सावध राहण्यास सांगितले आहे.

रिझर्व्ह बँकेच्या या स्पष्टीकरणामुळे सोन्याच्या साठ्याबाबत सुरू असलेल्या चर्चांना पूर्णविराम मिळाला आहे.