बांधकाम साहित्याचा व्यवसाय करणाऱ्या तक्रारदाराला १२ मे ते १६ मे या कालावधीत काही बनावट मेसेज आले होते. "जर तुम्ही गॅस बिलाचा तपशील अपडेट केला नाही, तर तुमचे MGL गॅस कनेक्शन खंडित केले जाईल," अशी भीती या मेसेजद्वारे घालण्यात आली होती. हे मेसेज खरे समजून तक्रारदाराने सायबर चोरांनी पाठवलेली एक 'APK फाईल' (App) डाउनलोड केली आणि केवळ १२ रुपये भरण्याचा प्रयत्न केला.
परंतु, यानंतर लगेचच त्यांच्या बँक खात्यातून १,६०,०११ रुपये, ५,००,०११ रुपये आणि २,२९९ रुपये असे तीन अनधिकृत व्यवहार होऊन एकूण ६.६२ लाख रुपये लंपास करण्यात आले. फसवणूक झाल्याचे लक्षात येताच तक्रारदाराने त्वरित राष्ट्रीय सायबर गुन्हे हेल्पलाइन (१९३०) वर संपर्क साधून तक्रार नोंदवली. त्यानंतर पवई पोलिसांनी याप्रकरणी एफआयआर (FIR) दाखल केला.
पोलीस उपायुक्त (DCP) दत्ता नलावडे आणि वरिष्ठ पोलीस निरीक्षक ए. एस. सावंत यांच्या मार्गदर्शनाखालील पथकाने मंगळूर शहर पोलिसांच्या मदतीने या पैशांच्या व्यवहाराचा माग (Trail) काढला. तपासात असे आढळून आले की, फसवणुकीची ही रक्कम कर्नाटकातील मंगळूर येथील केटरिंग व्यावसायिक एस. के. शेट्टी याच्या बँक खात्यात जमा झाली होती. सायबर गुन्हेगारांनी शेट्टीच्या खात्याचा वापर 'म्युल अकाउंट' (दुसऱ्याच्या चोरीचे पैसे वळवण्यासाठी वापरले जाणारे खाते) म्हणून केला होता.
शेट्टीने सुरुवातीला दावा केला की ही रक्कम त्याला एका ग्राहकाकडून मिळाली आहे. मात्र, पोलिसांनी त्याला नोटीस बजावली. ३० जून रोजी त्याचा अटकपूर्व जामीन अर्ज फेटाळण्यात आला. त्यानंतर सत्र न्यायालयाने अटकपूर्व जामिनावर अंतिम निर्णय देण्यापूर्वी, आरोपीला तक्रारदाराची संपूर्ण रक्कम परत जमा करण्याचे आदेश दिले.
या आर्थिक फसवणुकीचा तक्रारदाराच्या कौटुंबिक आयुष्यावर मोठा आघात झाला होता. ही रक्कम त्यांनी आपल्या मुलीच्या लग्नासाठी दोन वर्षांपासून कष्टाने जमा केली होती. पैसे गेल्यामुळे त्यांना ५ जुलै रोजी होणारे मुलीचे लग्न पुढे ढकलावे लागले होते. मात्र, आता संपूर्ण रक्कम परत मिळाल्यामुळे कुटुंबाचा जीव भांड्यात पडला असून, मुलीचे लग्न आता २० ऑगस्ट रोजी निश्चित झाले आहे.
MGL घोटाळ्यात मुंबईकरांचे ३ कोटींहून अधिक नुकसान मुंबई पोलिसांनी दिलेल्या माहितीनुसार, २५ मार्च ते १२ मे या अवघ्या दीड-दोन महिन्यांच्या कालावधीत महानगर गॅस लिमिटेड (MGL) च्या नावाखाली झालेल्या सायबर फसवणुकीत मुंबईकरांनी ३ कोटींहून अधिक रुपये गमावले आहेत.
अज्ञातांनी पाठवलेल्या लिंक्स किंवा APK फाईल्स कधीही डाउनलोड करू नका. 'APK' फाईलद्वारे सायबर चोर तुमच्या मोबाईलचा ताबा मिळवू शकतात.
गॅस किंवा वीज कनेक्शन कापण्याची धमकी देणारे मेसेज आल्यास अधिकृत कस्टमर केअरशी संपर्क साधा.
फसवणूक झाल्यास त्वरित १९३० या राष्ट्रीय सायबर हेल्पलाइनवर किंवा www.cybercrime.gov.in वर तक्रार नोंदवा, जेणेकरून बँक खाते वेळेत फ्रीझ करून पैसे वाचवता येतील.