ग्राहकांना परवडणारे आणि अर्थपूर्ण जीवनविमा संरक्षण उपलब्ध करून देण्यासाठी टीजेएसबी सहकारी बँक लिमिटेड आणि श्रीराम लाईफ इन्शुरन्स कंपनी यांनी महत्त्वपूर्ण बँकअॅश्युरन्स करार केला आहे. १५ नोव्हेंबर २०२५ रोजी स्वाक्षरी करण्यात आलेल्या या करारान्वये, टीजेएसबी बँक IRDAI च्या कॉर्पोरेट एजन्सी फ्रेमवर्कअंतर्गत श्रीराम लाईफचे विविध विमा उत्पादने आपल्या शाखांमार्फत वितरित करणार आहे.
या भागीदारीमुळे महाराष्ट्र, गुजरात, गोवा, कर्नाटक आणि मध्य प्रदेशातील ग्राहकांना जीवनविम्याच्या सोप्या, परवडणाऱ्या आणि संरक्षण-केंद्रित योजना सहज उपलब्ध होणार आहेत. विशेषतः पहिल्यांदा विमा घेणारे, अल्प उत्पन्न गटातील कुटुंबे आणि अर्धशहरी व ग्रामीण भागातील ग्राहक यांना याचा मोठा लाभ होणार आहे.
टीजेएसबी बँकेचे मजबूत शाखा जाळे आणि ग्राहकांशी असलेले दीर्घकालीन विश्वासाचे नाते, तसेच श्रीराम लाईफ इन्शुरन्सची संरक्षणावर आधारित आणि किफायतशीर उत्पादने यांचा संगम करून विमा पोहोच वाढवण्यावर दोन्ही संस्थांचा भर आहे. या करारामुळे टर्म प्लॅन, एन्डोमेंट पॉलिसी, युनिट लिंक्ड इन्शुरन्स प्लॅन (ULIP), अॅन्युइटी आणि दीर्घकालीन बचत योजनांसारखे विविध विमा पर्याय ग्राहकांना एकाच ठिकाणी मिळणार आहेत.
टीजेएसबी सहकारी बँक लिमिटेडचे व्यवस्थापकीय संचालक व मुख्य कार्यकारी अधिकारी निखिल अरेकर म्हणाले,
“ग्राहकांचे आर्थिक आरोग्य जपणे हेच टीजेएसबीचे मूलभूत ध्येय आहे. श्रीराम लाईफ इन्शुरन्ससोबतच्या या भागीदारीमुळे विशेषतः मध्यम व अल्प उत्पन्न गटातील कुटुंबांना विश्वासार्ह आणि परवडणारे संरक्षण उपाय मिळतील. ही भागीदारी समावेशक विकासाबाबतची आमची बांधिलकी अधिक मजबूत करते.”
श्रीराम लाईफ इन्शुरन्सचे व्यवस्थापकीय संचालक व मुख्य कार्यकारी अधिकारी कास्परस जे.एच. क्रॉमहूट यांनी सांगितले,
“टीजेएसबी बँकेसोबतच्या सहकार्यामुळे तंत्रज्ञानाच्या मदतीने मोठ्या प्रमाणावर लोकांपर्यंत अर्थपूर्ण जीवनविमा सेवा पोहोचवण्याचे आमचे उद्दिष्ट आहे. ‘२०४७ पर्यंत सर्वांसाठी विमा’ या भारत सरकारच्या दृष्टिकोनाशी सुसंगत अशी ही भागीदारी आहे.”
या करारामुळे विमा जनजागृती वाढण्यास मदत होणार असून, ग्राहकांना त्यांच्या गरजांनुसार योग्य जीवनविमा योजना निवडणे अधिक सोपे होईल. बँकेच्या शाखांमार्फत विमा उपलब्ध झाल्याने प्रक्रिया सुलभ होणार असून, विश्वासार्हतेतही वाढ होईल.