नवी दिल्ली :
देशातील आर्थिक समावेशन वाढविण्यासाठी राबविण्यात आलेल्या चार महिन्यांच्या राष्ट्रव्यापी मोहिमेला मोठे यश मिळाले आहे. या मोहिमेदरम्यान तब्बल १.११ कोटी नवी प्रधानमंत्री जनधन योजना (PMJDY) खाती उघडण्यात आली असल्याची माहिती अर्थ मंत्रालयाने दिली आहे.
ही वित्तीय समावेशन संतृप्ति मोहीम ३१ ऑक्टोबर रोजी संपली असून, तिचा उद्देश प्रत्येक पात्र नागरिकाला प्रमुख आर्थिक योजनांच्या कक्षेत आणणे हा होता. मंत्रालयाने सांगितले की, या काळात जनधन खात्यांबरोबरच इतर योजनांमध्येही मोठ्या प्रमाणात नोंदणी झाली.
२.८६ कोटी लोकांनी प्रधानमंत्री सुरक्षा विमा योजना (PMSBY) मध्ये नोंदणी केली.
१.४० कोटी नागरिकांनी प्रधानमंत्री जीवन ज्योती विमा योजना (PMJJBY) स्वीकारली.
४४.४३ लाख लोकांनी अटल पेन्शन योजना (APY) मध्ये सहभाग नोंदवला.
देशभरात नोंदणी सुलभ करण्यासाठी २,६७,३४५ शिबिरे आयोजित करण्यात आली. या शिबिरांमध्ये नवीन खाते उघडणे, निष्क्रिय खात्यांसाठी री-केवायसी, नामांकन अद्यतने यांसह आर्थिक साक्षरतेवर ही विशेष भर देण्यात आला. डिजिटल फसवणूक, दावा न केलेल्या ठेवी आणि तक्रार निवारण प्रक्रियेबाबत जनजागृती करण्यात आली.
अर्थ मंत्रालयाच्या निवेदनानुसार, या मोहिमेमुळे तळागाळापर्यंत वित्तीय सेवांचा विस्तार झाला आहे. सरकार सर्व भागधारकांच्या सक्रिय सहकार्याने देशभर समावेशक विकास आणि आर्थिक सक्षमीकरण साध्य करण्याच्या दिशेने वाटचाल करत आहे.
मुख्य उद्दिष्ट:
प्रत्येक पात्र नागरिकाला बँकिंग, विमा आणि पेन्शन योजनांच्या कवचात आणणे
आर्थिक साक्षरता वाढवून फसवणुकीपासून नागरिकांचे संरक्षण
ही मोहीम देशातील वित्तीय समावेशनाच्या प्रयत्नांना गती देणारी ठरली असून, ग्रामीण आणि शहरी भागातील लाखो लोकांना आर्थिक मुख्य प्रवाहात आणण्यात ती निर्णायक ठरली आहे.