मुंबई येथे पार पडलेल्या या दिमाखदार सोहळ्यात बँकेचे मुख्य कार्यकारी अधिकारी (CEO) त्रिगुण कुलकर्णी, उपसरव्यवस्थापक (DGM) संतोष जाधव आणि उपसरव्यवस्थापक (DGM) योगेश्वर सहाणे यांनी सर्व संचालक मंडळ, कर्मचारी व सभासदांच्या वतीने हा प्रतिष्ठेचा पुरस्कार स्वीकारला.
महाराष्ट्र अर्बन को-ऑपरेटिव्ह बँक्स फेडरेशन ही राज्यातील नागरी सहकारी बँकांची सर्वोच्च संस्था आहे. बँकांची आर्थिक शिस्त, ठेवींची वाढ, थकीत कर्जाचे प्रमाण (NPA), आधुनिक तंत्रज्ञानाचा वापर आणि ग्राहकांना दिली जाणारी दर्जेदार सेवा यांसारख्या अनेक कडक निकषांच्या आधारे दरवर्षी हे पुरस्कार जाहीर केले जातात.
₹ २५०० ते ५००० कोटींपेक्षा अधिक ठेवी असलेल्या अत्यंत स्पर्धात्मक गटात नामको बँकेने आपली उत्तम आर्थिक स्थिती आणि पारदर्शक कारभाराच्या जोरावर बाजी मारत प्रथम क्रमांक पटकावला आहे.
"सहकार क्षेत्रात जेव्हा विश्वासाला आणि गुणवत्तेला जोड मिळते, तेव्हा यश दूर राहत नाही," याचेच उत्तम उदाहरण नामको बँकेने दाखवून दिले आहे.
गेल्या काही वर्षांत बँकिंग क्षेत्रात आलेले अनेक आर्थिक चढ-उतार आणि डिजिटल क्रांतीच्या काळातही नामको बँकेने आपला पाया अत्यंत मजबूत ठेवला आहे. 'मल्टी-स्टेट शेड्युल्ड बँक' म्हणून नावारूपाला आलेल्या या बँकेने केवळ ठेवी वाढवण्यावर भर न देता; लघू उद्योजक, व्यापारी, शेतकरी आणि सर्वसामान्य खातेदारांच्या आर्थिक गरजांना नेहमीच बळ दिले आहे.
हा पुरस्कार केवळ एका बँकेचा सन्मान नसून, तो बँकेवर अविरत श्रद्धा ठेवणाऱ्या लाखो सभासद, खातेदार आणि दिवस-रात्र मेहनत करणाऱ्या कर्मचाऱ्यांच्या निष्ठेची पावती आहे.
बँकेचे व्यवस्थापन व संचालक मंडळाने या यशाबद्दल बोलताना आनंद व्यक्त केला. "बँकेला मिळालेला हा गौरव अत्यंत अभिमानास्पद आहे. ही कामगिरी म्हणजे आमचे सभासद, खातेदार, ग्राहक यांच्या अथांग विश्वासाची आणि बँकेच्या अधिकारी व कर्मचाऱ्यांच्या अथक परिश्रमांची पोचपावती आहे. विश्वासाची ही परंपरा अशीच पुढे चालू राहील," असा विश्वास बँकेतर्फे व्यक्त करण्यात आला.
'आपल्या विश्वासामुळेच आमची प्रगती' हे ब्रीदवाक्य उराशी बाळगून चालणाऱ्या नामको बँकेला या उत्तुंग यशाबद्दल सर्व स्तरातून अभिनंदनाचा वर्षाव होत आहे!