स्वामी स्वरूपानंद पतसंस्थेच्या २० जून ते २० जुलै या कालखंडात घोषित झालेल्या ठेव वृद्धिमासाची समाप्ती झाली. कोणत्याही आर्थिक संस्थेला अभिमान वाटावा अशा ३० कोटी ०८लाखांच्या दणदणीत ठेवी स्वरूपानंदकडे जमा झाल्या. या ठेव वृद्धी मासात मुदत संपल्याने नूतनीकरण केलेल्या ठेवी रुपये ८७ कोटी ३८ लाख असून एकूण रुपये ११७ कोटी ४३ लाखांचे ठेव व्यवहार स्वरूपानंदच्या ठेव वृद्धी मासात झाले. २७० इतक्या ठेवीदारांनी संस्थेकडे आपली ठेव रक्कम नव्याने ठेवली. संस्थेच्या सर्वच शाखांमध्ये मोठ्या प्रमाणावर ठेवीदारांचा प्रतिसाद प्राप्त झाला.
स्वरूपानंद पतसंस्थेच्या एकूण ठेवी ३७९ कोटी ३० लाखांपर्यंत पोहोचल्या आहेत. स्वरूपानंदने विविध कारणासाठी वितरित केलेले येणे कर्ज रुपये २६४ कोटी ०३ लाख असून माहे जूनपर्यंत कर्जाची वसुली ९९.७१% इतकी विक्रमी राहिली आहे. संस्थेने प्रमाणबद्ध पद्धतीने अपेक्षित असल्याप्रमाणे एस.एल.आर तसेच विविध निधींची १००% गुंतवणूक महा.सह.कायदा कलम ७० अ नुसार योग्य बँकेत केलेली आहे. संस्थेच्या भांडवल पर्याप्ततेचे प्रमाण २८% इतके भरभक्कम असून संस्थेचा सीडी रेशो ६७% इतका आहे. संस्थेच्या आर्थिक ताकदीचा निर्देशक असणाऱ्या स्वनिधी पोटी रुपये ४८ कोटी १३ लाख संस्थेकडे जमा आहे.ठेव वृद्धी मासात प्रत्येक शाखेला स्वतंत्र टार्गेट देण्यात आली होती. त्यानुसार संस्थेचे अधिकारी, कर्मचारी यांनी नियोजनबद्ध संपर्क, संवाद साधून समाजातील सर्व स्थरातून ठेव संकलित केली. २७० नवे खातेदार या ठेव वृद्धीमासा दरम्यान संस्थेशी संलग्न झाले.
जनमानसात संस्थेची असलेली पारदर्शक प्रतिमा, संस्थेवर असलेला विश्वास या निमित्ताने प्रतिबिंबित झाला असे सांगत संस्थेच्या अध्यक्षांनी सर्व ठेवीदारांना धन्यवाद देतानाच संस्था सर्व ग्राहक सभासदांना उत्तमोत्तम आर्थिक सेवा देण्याच व्रत सदैव सुरू ठेवेल असे सांगत ठेव वृद्धी मासापूर्वी जाहीर केल्यानुसार संस्थेकडे नव्याने ठेव ठेवलेल्या प्रत्येक ठेवी मागे रुपये २००/- संस्था सामाजिक दायित्व निधी मधून सैनिक कल्याण निधीसाठी देणार आहे.