अहमदनगर मर्चंट्स को-ऑपरेटिव्ह बँकेला शेड्युल्ड बँकेचा दर्जा मिळालेला आहे. या समावेशामुळे, ही बँक आरबीआय फ्रेमवर्क अंतर्गत विविध विशेषाधिकारांसाठी पात्र ठरते, ज्यामध्ये तरलता सुविधांचा प्रवेश, क्लिअरिंग हाऊस सिस्टममध्ये सहभाग आणि सरकारी प्रकल्पांना कर्ज देण्याची क्षमता यांचा समावेश आहे. यामुळे त्यांची कार्यक्षेत्र, विश्वासार्हता आणि व्यावसायिक क्षमता वाढते.
अहमदनगर मर्चंट्स को-ऑपरेटिव्ह बँक ही मूलतः १९७२ पासून सुरू झालेली आहे. त्या काळी पारंपरिक बँकिंग संस्था म्हणून सुरुवात करून, आज एक आधुनिक, भविष्यकालीन आव्हानांचा वेध घेणारी, सुस्थापित आणि विश्वासार्ह बँकिंग संस्था असा लौकिक मिळविलेला आहे.
भारतात सुमारे १,४२३ नागरी सहकारी बँका आहेत, ज्यांचा एकूण व्यवसाय अंदाजे ४.१३ लाख कोटी रुपयांचा आहे. चालू आर्थिक वर्षात विश्वेश्वर सहकारी बँक, अहमदनगर मर्चंट्स को-ऑप. बँक आणि देवगिरी नागरी सहकारी बँक या तीन नागरी सहकारी बँकांचा समावेश झाल्यामुळे, शेड्युल्ड नागरी सहकारी बँकांची संख्या आता ५२ झाली आहे.
अहमदनगर मर्चंट्स को-ऑपरेटिव्ह बँकेबाबतच्या अधिसूचनेचा हवाला देत, आरबीआयने म्हटले आहे की, "रिझर्व्ह बँक ऑफ इंडिया कायदा, १९३४ (१९३४ चा २) च्या कलम ४२ च्या उपकलम (६) च्या कलम (अ) नुसार, भारतीय रिझर्व्ह बँक याद्वारे 'अहमदनगर मर्चंट्स को-ऑप. बँक लिमिटेड, अहमदनगर' ला सदर कायद्याच्या दुसऱ्या अनुसूचीमध्ये समाविष्ट करण्याचे निर्देश देत आहे."