परभणी : भारतीय रिझर्व्ह बँकेने (RBI) ग्राहकांच्या हिताचा हवाला देत राज्यातील एका सहकारी बँकेवर कारवाईचा बडगा कायम ठेवला आहे. परभणी जिल्ह्यातील 'सोनपेठ नागरी सहकारी बँक मर्यादित' (Sonpeth Nagari Sahakari Bank Maryadit) यांच्यावर लागू असलेले निर्बंध आणखी तीन महिन्यांसाठी वाढवण्यात आले आहेत. आता हे निर्देश ३० जानेवारी २०२७ पर्यंत लागू राहणार असल्याची माहिती रिझर्व्ह बँकेने दिली आहे.
रिझर्व्ह बँकेने बँकिंग नियमन कायदा, १९४९ च्या कलम ३५A आणि कलम ५६ अंतर्गत मिळालेल्या अधिकारांचा वापर करत या बँकेवर याआधी २९ जुलै २०२५ रोजी ६ महिन्यांसाठी निर्बंध घातले होते. ही मुदत ३० जानेवारी २०२६ रोजी संपत होती, ती यापूर्वी ३० ऑक्टोबर २०२६ पर्यंत वाढवण्यात आली होती. आता जनहित आणि सार्वजनिक हित लक्षात घेता, ३० ऑक्टोबर २०२६ रोजी संपणारी ही मुदत पुढे चालवण्याचे रिझर्व्ह बँकेने ठरवले आहे.
नवीन आदेशानुसार, हे निर्देश ३० ऑक्टोबर २०२६ रोजीच्या कामकाजाची वेळ संपल्यापासून ते ३० जानेवारी २०२७ रोजीच्या कामकाजाची वेळ संपण्यापर्यंत वाढवण्यात आले आहेत. मात्र, हे सर्व निर्णय बँकेच्या आर्थिक स्थितीच्या पुनरावलोकनाच्या अधीन राहतील, असेही स्पष्ट करण्यात आले आहे.
रिझर्व्ह बँकेने स्पष्ट केले आहे की, ही मुदतवाढ किंवा बँकेच्या नियमांमधील बदल म्हणजे रिझर्व्ह बँकेचे या बँकेच्या आर्थिक स्थितीबद्दल समाधान झाले आहे, असे अजिबात समजले जाऊ नये. याआधी लागू असलेल्या निर्देशांच्या इतर सर्व अटी व नियम जसेच्या तसे कायम राहतील.