या महत्त्वाच्या सोहळ्यास ओडिशाचे राज्यपाल श्री ब्रजमोहन राम, मुख्यमंत्री श्री मोहन चरण माझी, केंद्रीय अर्थ आणि कॉर्पोरेट व्यवहार मंत्री श्रीमती निर्मला सीतारामन, केंद्रीय आदिवासी व्यवहार मंत्री श्री जुएल ओरम, ओडिशाचे उपमुख्यमंत्र्यागण श्री कनक वर्धन सिंग देव आणि श्रीमती प्रावती परिडा, तसेच खासदार श्री मनमोहन सामल आणि श्रीमती अपराजिता सारंगी उपस्थित होते.
कार्यक्रमात बोलताना पंतप्रधान नरेंद्र मोदी यांनी भारताच्या डिजिटल आर्थिक पायाभूत सुविधांना बळकट करण्यासाठी आणि तांत्रिक स्वयंपूर्णता साधण्यासाठी या संस्थांचे महत्त्व विशद केले. हा प्रकल्प म्हणजेच आर्थिक विकासाचा लाभ देशाच्या प्रत्येक प्रदेशापर्यंत आणि प्रत्येक नागरिकापर्यंत पोहोचवण्याच्या शासन व्यवस्थेच्या बदलत्या दृष्टिकोनाचे उत्तम उदाहरण आहे, असे पंतप्रधान म्हणाले. सुरक्षित बँकिंग प्रणालीसाठी मजबूत डेटा सेंटर आणि शक्तिशाली संगणकीय प्रणालींवर आधारित सुरक्षित डिजिटल पायाभूत सुविधांची आवश्यकता असून, आरबीआयचे नवीन डेटा सेंटर या दिशेने अत्यंत महत्त्वाचे पाऊल ठरेल, असा विश्वास त्यांनी व्यक्त केला.
केंद्रीय अर्थ आणि कॉर्पोरेट व्यवहार मंत्री श्रीमती निर्मला सीतारामन यांनी आपल्या मनोगतात आर्थिक स्थिरता राखण्यासाठी आणि शाश्वत आर्थिक वृद्धीला समर्थन देण्यासाठी लवचिक पायाभूत सुविधांच्या सामरिक महत्त्वावर भर दिला. नव्याने सुरू झालेले डेटा सेंटर आरबीआयच्या RTGS आणि NEFT सारख्या अत्यंत महत्त्वाच्या यंत्रणा (mission-critical systems) सामावून घेईल, तर प्रशिक्षण संस्थेमार्फत सायबरसुरक्षा, कृत्रिम बुद्धिमत्ता (AI) आणि इतर उदयोन्मुख तंत्रज्ञानामध्ये उच्च कौशल्य तयार केले जाईल, असे त्यांनी स्पष्ट केले.
स्वागतपर भाषण करताना रिझर्व्ह बँकेचे गव्हर्नर श्री संजय मल्होत्रा यांनी कार्यक्रमात उपस्थित राहिल्याबद्दल माननीय पंतप्रधानांचे आभार मानले. उदयोन्मुख तंत्रज्ञानाचा वापर करणे, डिजिटल पायाभूत सुविधा बळकट करणे, सायबरसुरक्षा अधिक मजबूत करणे, स्वदेशी तांत्रिक क्षमता विकसित करणे आणि २०४७ पर्यंत विकसित राष्ट्र बनण्याच्या देशाच्या आकांक्षांना पूर्ण पाठिंबा देण्यास रिझर्व्ह बँक कटिबद्ध असल्याचे त्यांनी नमूद केले.
या उद्घाटन सोहळ्यास केंद्र व राज्य सरकारचे उच्चपदस्थ अधिकारी, उद्योग क्षेत्रातील दिग्गज, शिक्षण क्षेत्रातील तज्ज्ञ, रिझर्व्ह बँकेच्या केंद्रीय संचालक मंडळाचे संचालक, विविध बँकांचे प्रमुख, तंत्रज्ञान पुरवठादार आणि आरबीआयचे वरिष्ठ अधिकारी मोठ्या संख्येने उपस्थित होते.