मुंबई: सध्या इराण, इस्रायल आणि अमेरिका यांच्यातील युद्धजन्य परिस्थितीमुळे निर्माण झालेल्या गॅस तुटवड्याच्या अफवांचा फायदा सायबर गुन्हेगार घेत आहेत. गॅस संपण्याच्या भीतीने घाईघाईत बुकिंग करणाऱ्या नागरिकांना लक्ष्य केले जात असून, भारतीय सायबर गुन्हे समन्वय केंद्राने (I4C) याबाबत सतर्कतेचा इशारा दिला आहे.
फसवणूक करणारे गुन्हेगार सोशल मीडिया, एसएमएस आणि व्हॉट्सॲपचा वापर करून नागरिकांना संदेश पाठवतात. यामध्ये "गॅसचा मोठा तुटवडा असून त्वरित बुकिंग करा अन्यथा पुरवठा बंद होईल" अशी भीती घातली जाते. कधीकधी मोठ्या सवलतीचे आमिषही दाखवले जाते. या संदेशांमधील लिंकवर क्लिक केल्यावर वापरकर्त्यांना बनावट वेबसाइटवर नेले जाते किंवा संशयास्पद ॲप डाऊनलोड करण्यास भाग पाडले जाते. पेमेंटच्या नावाखाली OTP, UPI PIN किंवा बँकेची गोपनीय माहिती मिळवून काही क्षणांत खाते रिकामे केले जाते.
अधिकृत माध्यमांचा वापर: गॅस बुकिंगसाठी नेहमी myLPG.in ही अधिकृत वेबसाइट किंवा संबंधित गॅस कंपन्यांच्या (Indane, HP, BPCL) अधिकृत ॲप्सचाच वापर करा.
अज्ञात लिंक्स टाळा: व्हॉट्सॲप किंवा एसएमएसद्वारे आलेल्या कोणत्याही अनोळखी लिंकवर क्लिक करू नका किंवा APK फाईल्स इन्स्टॉल करू नका.
माहितीची गोपनीयता: कोणतीही गॅस एजन्सी फोनवर तुमचा बँक पिन किंवा ओटीपी मागत नाही, हे लक्षात ठेवा.
सत्यता पडताळा: शंका आल्यास आपल्या नियमित गॅस वितरकाशी थेट संपर्क साधून खात्री करा.
जर तुमची आर्थिक फसवणूक झाली असेल, तर त्वरित आपले बँक खाते/कार्ड ब्लॉक करा. या संदर्भात 1930 या हेल्पलाइन क्रमांकावर कॉल करा किंवा cybercrime.gov.in या पोर्टलवर आपली तक्रार नोंदवा. जागरूक राहा आणि आपली वैयक्तिक माहिती सुरक्षित ठेवा.
