- Home
- ताज्या बातम्या
- अर्थ वार्ता
- साक्षरता अभियान
- तंत्रज्ञान
- नोकरीची संधी
- यशोगाथा
- Youtube
- कार्यक्रम व वेबिनार
- ई मासिकई मासिक
- परिपत्रक
विटा : आपल्या पारदर्शक कारभारासाठी आणि विश्वासार्ह बँकिंग सेवेसाठी ओळखली जाणारी 'शिवप्रताप मल्टिस्टेट कोऑपरेटिव्ह क्रेडिट सोसायटी' लवकरच एक हजार कोटी रुपयांचा व्यावसायिक टप्पा पार करेल. आगामी काळात ही संस्था राज्यातील इतर सर्वच पतसंस्थांसाठी एक आदर्श 'रोल मॉडेल' ठरेल, असा ठाम विश्वास संस्थेचे अध्यक्ष शेखर प्रतापदादा साळुंखे यांनी व्यक्त केला आहे. विटा येथे पार पडलेल्या संस्थेच्या २४ व्या वार्षिक सर्वसाधारण सभेत ते बोलत होते.
संस्थेची आर्थिक घोडदौड, शून्य टक्के एनपीए (NPA) आणि सभासदांना घोषित केलेला ११ टक्के लाभांश यांमुळे ही वार्षिक सभा अत्यंत उत्साहात पार पडली.
वार्षिक सभेच्या अध्यक्षस्थानावरून बोलताना शेखर साळुंखे यांनी संस्थेच्या यशाचे श्रेय संस्थापकांच्या विचारांना दिले. ते म्हणाले,
उच्चतम बँकिंग सेवा हीच खरी सभासद सेवा" ही संस्थापक प्रतापशेठ (दादा) साळुंखे यांची शिकवण आम्ही आजही अत्यंत निष्ठेने जपली आहे. त्यांच्या याच विचारांचा वारसा पुढे नेत, बदलत्या तंत्रज्ञानाचा स्वीकार करून संस्था आज सभासदांना सर्वोत्तम, सुरक्षित आणि पारदर्शक बँकिंग सेवा पुरवत आहे. याच विश्वासाच्या बळावर आज संस्था यशाची नवनवीन शिखरे पादाक्रांत करत आहे.
शेखर साळुंखे यांनी यावेळी संस्थेच्या गेल्या आर्थिक वर्षातील प्रगतीचा सविस्तर ताळेबंद मांडला. संस्थेने सर्वच आघाड्यांवर चमकदार कामगिरी केली असून प्रमुख वित्तीय आकडेवारी खालीलप्रमाणे आहे:
ठेवींमध्ये मोठी वाढ: संस्थेच्या एकूण ठेवींमध्ये २१.५८% इतकी घवघवीत वाढ झाली असून, एकूण ठेवी आता ५२७ कोटी रुपयांवर पोहोचल्या आहेत.
कर्ज वाटप आणि गुंतवणूक: संस्थेचा कर्ज व्यवसाय ४०० कोटी रुपये असून, विविध सुरक्षित क्षेत्रांमधील गुंतवणूक १४० कोटी रुपयांवर पोहोचली आहे.
नफा आणि एन.पी.ए. (NPA): चालू वर्षात संस्थेला १०.४१ कोटी रुपयांचा ढोबळ नफा झाला आहे. सर्वात महत्त्वाची बाब म्हणजे, अत्यंत काटेकोर कर्ज वाटप आणि वसुली
नियोजनामुळे संस्थेचा एन.पी.ए. (थकीत कर्ज) शून्य टक्के राखण्यात यश आले आहे.
'अ' दर्जा व लाभांश: उत्कृष्ट आणि पारदर्शक कारभारामुळे संस्थेला लेखापरीक्षणात (Audit) मानाचा 'अ' वर्ग प्राप्त झाला आहे. या यशाचा आनंद सभासदांसोबत वाटून घेण्यासाठी सर्व सभासदांना ११ टक्के लाभांश (Dividend) जाहीर करण्यात आला आहे.
सभेची सुरुवात गणेश बाबर यांनी केलेल्या स्वागतपर भाषणाने झाली. या वार्षिक सभेच्या निमित्ताने उपस्थित असलेल्या सहकार क्षेत्रातील विविध मान्यवरांनी शिवप्रताप मल्टिस्टेटच्या कार्याचे कौतुक केले. यामध्ये दिलीप सव्वाशे, शिवाजी पवार, रामचंद्र गुरव, डॉ. कुमुदिनी नष्टे, लक्ष्मण कोरे आणि उत्तम घाडगे यांची समयोचित भाषणे झाली. त्यांनी संस्थेच्या प्रगतीचा आलेख असाच उंचावत राहो, अशा सदिच्छा व्यक्त केल्या.
या सभेचे नेटके सूत्रसंचालन तेजस्वी पाटील यांनी केले, तर उपस्थितांचे आभार हणमंत पाटील यांनी मानले.
या महत्त्वपूर्ण सभेला शिवप्रताप मल्टिस्टेटचे संचालक सीताराम हारुगडे, गोपाळ तारळेकर, प्रवीण पवार, गणेश अदाटे, महिला संचालिका सुरेखा जाधव, रोहिणी जाधव तसेच संस्थेचे सल्लागार अशोक नाईक यांच्यासह संस्थेचे पदाधिकारी, कर्मचारी आणि मोठ्या संख्येने सभासद उपस्थित होते. सर्व सभासदांनी संस्थेच्या कारभारावर पूर्ण समाधान व्यक्त केले.