व्यंकटेश्वरा सहकारी बँकेची १५० कोटींची घौडदौड; १०% लाभांश जाहीर!

इचलकरंजी : सहकार क्षेत्रातील तीव्र स्पर्धा आणि बदलत्या आर्थिक वातावरणातही दि व्यंकटेश्वरा सहकारी बँक लि., इचलकरंजी ने आपली सक्षम व यशस्वी वाटचाल कायम राखली आहे. आर्थिक वर्ष २०२५-२०२६ अखेर बँकेने १५० कोटी रुपयांच्या एकूण व्यवसायाचा महत्त्वपूर्ण टप्पा यशस्वीपणे पूर्ण केला आहे. बँकेच्या या उल्लेखिनीय कामगिरीची आणि आर्थिक सक्षमतेची पावती म्हणून सभासदांना १० टक्के लाभांश जाहीर करण्यात आला असल्याची घोषणा बँकेचे चेअरमन श्रीकांत मंत्री यांनी केली.

दि व्यंकटेश्वरा सहकारी बँकेची ३१ वी वार्षिक सर्वसाधारण सभा इचलकरंजी येथील महेश सेवा समितीच्या सभागृहात अत्यंत उत्साहपूर्ण आणि खेळीमेळीच्या वातावरणात पार पडली. या सभेच्या अध्यक्षस्थानावरून बोलताना चेअरमन श्रीकांत मंत्री यांनी बँकेच्या प्रगतीचा विस्तृत आढावा मांडला व आगामी आर्थिक वर्षातील विकासाची दिशा स्पष्ट केली.

आर्थिक स्थितीचा भक्कम आलेख:

बँकेच्या आर्थिक स्थितीबाबत माहिती देताना चेअरमन यांनी सांगितले की:

• एकूण ठेवी: ₹९४ कोटी ११ लाख

• एकूण कर्ज वितरण: ₹५६ कोटी १६ लाख

• एकूण व्यवसाय: ₹१५० कोटी

• ढोबळ नफा: ₹१ कोटी ४० लाख

• बँकेचे स्वनिधी: ₹११ कोटी

• एन.पी.ए. (NPA): ०% (शून्य टक्के)

• ऑडीट वर्ग: 'अ' वर्ग कायम

चालू आर्थिक वर्षात बँक एक नवीन शाखा सुरू करणार असल्याचे यावेळी जाहीर करण्यात आले. याशिवाय, बदलत्या आधुनिक बँकिंग व्यवस्थेनुसार ग्राहकांना जलद व सुलभ सेवा देण्यासाठी बँकेने डिजिटल बँकिंगच्या दिशेनेही पावले उचलली आहेत, अशी माहिती ज्येष्ठ संचालक पुनमचंद दरगड यांनी दिली.

सभेच्या प्रारंभी चेअरमन श्रीकांत मंत्री, जयसिंगपूरचे प्रसिद्ध उद्योगपती विनोदचंद घोडावत, श्रद्धा ग्रुप ऑफ इन्स्टिट्यूशन्सचे संस्थापक ए. आर. तांबे, बँकेचे ज्येष्ठ मार्गदर्शक रामविलास मुंदडा, भीमकरण छापरवाल, व्हा. चेअरमन इंदरचंद लोया, ज्येष्ठ संचालक पुनमचंद दरगड आणि रामकिशोर बांगड यांच्या हस्ते दीपप्रज्वलन करण्यात आले.

उद्योगपती विनोदचंद घोडावत: बँकेने स्थापनेपासून 'अ' ऑडीट वर्ग कायम राखणे ही बाब बँकेच्या उत्कृष्ट कामगिरीची व सभासदांच्या विश्वासाची पोचपावती असल्याचे त्यांनी सांगितले.

ए. आर. तांबे: बँकेच्या या सातत्यपूर्ण प्रगतीबद्दल सर्व संचालक मंडळ आणि कर्मचाऱ्यांचे मनापासून कौतुक केले.

प्रारंभी संचालिका शशिकला बोरा यांनी स्वागत केले व १९९६ साली इचलकरंजी शहरात बँक स्थापन करण्यामागील मूळ उद्देशाचा इतिहास मांडला. सभेच्या नोटीस व विषयपत्रिकेचे वाचन मुख्य कार्यकारी अधिकारी (CEO) सुनिल कोईक यांनी केले, ज्याला सर्व सभासदांनी एकमताने मंजुरी दिली.

यावेळी संचालक पन्नालाल बिर्ला, गिरीराज मोहता, ओमप्रकाश चांडक, सीए सत्यनारायण रांदड, नितीन धूत, मनोज सारडा, ॲड. गोपाळ सावंत, राजीव खटावकर, संजय आवळे, विनायक हेरवाडे, सीए सुरेशकुमार लोहिया, मुकेश खाबानी, जनरल मॅनेजर हिराचंद जंगले यांच्यासह सर्व कर्मचारी व सभासद मोठ्या संख्येने उपस्थित होते. सभेचे सूत्रसंचालन सुनिल मुंदडा यांनी केले व संचालिका निर्मला बालदी यांनी आभार मानले.