४० वर्षांची यशस्वी परंपरा, सभासद-ग्राहकांचा दृढ विश्वास आणि कर्मचाऱ्यांचे अथक परिश्रम यांच्या जोरावर सांगली जिल्हा मध्यवर्ती सहकारी बँक लि., सांगलीच्या महावीर नगर शाखेने ४१ व्या वर्षात यशस्वी पदार्पण केले आहे. या ४१ व्या वर्धापनदिनानिमित्त शाखेमध्ये अत्यंत उत्साहपूर्ण वातावरणात भव्य कार्यक्रमाचे आयोजन करण्यात आले होते. वर्धापनदिनाचे औचित्य साधून शाखेने एकाच दिवसात ३ कोटी रुपयांची भरीव व्यवसायवाढ नोंदवत विकासाची नवी भरारी घेतली आहे.
वर्धापनदिन सोहळ्याची सुरुवात बँकेच्या उपाध्यक्षा मा. जयश्रीताई पाटील आणि संचालक मा. वैभवदादा शिंदे यांच्या शुभहस्ते दीपप्रज्वलन करून करण्यात आली. यावेळी राजारामबापू पाटील बँकेच्या राजवाडा शाखेचे शाखाधिकारी श्री. विनायक पाटील यांच्यासह विविध क्षेत्रांतील मान्यवर प्रामुख्याने उपस्थित होते.
कार्यक्रमास बँकेचे वरिष्ठ अधिकारी श्री. कोथळे साहेब, श्री. डोंबाळे साहेब, महावीर नगर शाखेचे शाखाधिकारी श्री. कांबळे, पासिंग ऑफिसर श्री. राहुल माळी यांच्यासह शाखेतील सर्व अधिकारी व कर्मचारी वर्ग मोठ्या संख्येने उपस्थित होता.
४० वर्षे ग्राहकांनी दाखवलेल्या विश्वासाला पात्र ठरत महावीर नगर शाखेने वर्धापनदिनाच्या दिवशी व्यवसायात मोठी मजल मारली. शाखेने चालू खात्यांमध्ये (Current Accounts) ₹१ कोटी ५० लाख इतकी भरघोस वाढ साध्य केली, तर मुदत ठेवींमध्ये (Fixed Deposits) ₹१ कोटी ५० लाख जमा करण्यात यश मिळवले. अशाप्रकारे अवघ्या एका दिवसात शाखेने एकूण ₹३ कोटी रुपयांच्या ठेवी संकलित करत एक नवा टप्पा गाठला आहे.
गेल्या ४ दशकांपासून महावीर नगर शाखेने आपल्या उत्तम ग्राहकसेवेच्या बळावर सांगली शहरातील नागरिकांच्या मनात विश्वासाचे नाते निर्माण केले आहे. ४० वर्षांच्या या समृद्ध प्रवासानंतर ४१ व्या वर्षात टाकलेले हे पाऊल शाखेच्या अधिक मजबूत आणि उज्ज्वल भविष्याची साक्ष देत आहे. आगामी काळातही हीच विश्वासाची आणि विकासाची परंपरा अधिक वेगाने पुढे नेण्याचा संकल्प यावेळी व्यक्त करण्यात आला.