नांदेड : नांदेड जिल्हा मध्यवर्ती सहकारी बँकेच्या नवनिर्वाचित अध्यक्षा आमदार डॉ. तुषार गोविंदराव राठोड आणि उपाध्यक्ष डॉ. सौ. मिनल निरंजन पाटील खतगावकर यांनी दि. १३ ऑगस्ट २०२६ रोजी प्राधिकृत अधिकारी तथा जिल्हाधिकारी राहुल कर्डिले यांच्याकडून आपल्या पदाचा अधिकृत पदभार स्वीकारला. या सोहळ्यामुळे बँकेच्या नव्या सहकार पर्व आणि लोकनियुक्त प्रशासनाला प्रत्यक्ष सुरुवात झाली आहे.
नांदेड जिल्हा मध्यवर्ती सहकारी बँकेवर २० मे २०२६ रोजी प्रशासकीय प्राधिकृत अधिकारी म्हणून जिल्हाधिकारी राहुल कर्डिले यांची नियुक्ती करण्यात आली होती. त्यांनी २२ मे २०२६ रोजी बँकेचा पदभार स्वीकारून कारभाराची चक्रे फिरवली. त्यानंतर बँकेच्या संचालक मंडळाची बहुप्रतिक्षीत निवडणूक प्रक्रिया पार पडली. २८ जुलै २०२६ रोजी बँकेचे लोकनियुक्त संचालक मंडळ निर्वाचित घोषित करण्यात आले.
त्यानंतर १० ऑगस्ट २०२६ रोजी नवनिर्वाचित संचालकांची पहिली महत्त्वपूर्ण बैठक पार पडली. या बैठकीत बँकेच्या अध्यक्षपदी आमदार डॉ. तुषार गोविंदराव राठोड यांची तर उपाध्यक्षपदी डॉ. सौ. मिनल निरंजन पाटील खतगावकर यांची सर्वानुमते बिनविरोध निवड झाली. या बिनविरोध निवडणुकीमुळे बँकेतील राजकीय व सहकार क्षेत्रातील सलोख्याचे वातावरण अधोरेखित झाले.
पदग्रहण सोहळ्याच्या वेळी बँकेचे मुख्य कार्यकारी अधिकारी डॉ. अजय सा. कदम यांनी आपल्या प्रास्ताविकात जिल्हाधिकारी राहुल कर्डिले यांनी प्राधिकृत अधिकारी म्हणून बजावलेल्या कामगिरीचा व बँकेच्या प्रगतीसाठी राबवलेल्या उपाययोजनांचा सविस्तर आढावा मांडला.
यानंतर जिल्हाधिकारी राहुल कर्डिले यांनी नवनिर्वाचित अध्यक्ष व उपाध्यक्षांना भावी वाटचालीसाठी शुभेच्छा दिल्या. बँकेच्या हितासाठी व भविष्यातील विकासकामांसाठी जिल्हा प्रशासन सदैव सहकार्य करेल, असे आश्वासन त्यांनी याप्रसंगी दिले.
अध्यक्षपदाचा पदभार स्वीकारल्यानंतर आपल्या मनोगतात आमदार डॉ. तुषार राठोड म्हणाले,
"प्रशासकीय काळात जिल्हाधिकाऱ्यांनी बँकेच्या बळकटीकरणासाठी अत्यंत मोलाचे योगदान दिले आहे. आता लोकनियुक्त संचालक मंडळ बँकेच्या प्रगतीचा आलेख अधिक उंचावण्यासाठी आणि बँक भरभराटीस आणण्यासाठी पूर्ण निष्ठेने व संघटितपणे प्रयत्न करेल."
या सोहळ्याला नांदेड जिल्ह्यातील राजकीय व सामाजिक क्षेत्रातील अनेक दिग्गज नेत्यांनी हजेरी लावली होती.
ज्येष्ठ संचालक तथा आमदार प्रतापराव पाटील चिखलीकर, आमदार अमरनाथ राजूरकर, माजी आमदार ओमप्रकाश पोकर्णा, माजी महापौर किशोर स्वामी, माजी उपमहापौर सरजीतसिंग गिल, संचालक श्रीनिवास चव्हाण, राजेंद्र केशेवे, रामचंद्र मुसळे, शिवराम लुटे, बी. आर. कदम, कृष्णा पाटील आष्टीकर, राजू जाधव, मारोतीराव जाधव, दत्तात्रेय रेड्डी, माजी संचालक गंगाधरराव राठोड, मुख्य कार्यकारी अधिकारी डॉ. अजय सा. कदम, प्रभारी सरव्यवस्थापक पी. एस. महामुने यांच्यासह बँक अधिकारी, कर्मचारी व असंख्य कार्यकर्ते मोठ्या संख्येने उपस्थित होते.