रेठरे बुद्रुक : कृष्णा सहकारी बँकेने ५५ वर्षांची यशस्वी आणि शिस्तबद्ध वाटचाल पूर्ण केली आहे. आगामी काळात बँकेचा एकूण व्यवसाय २ हजार कोटी रुपयांपर्यंत नेण्याचे स्पष्ट उद्दिष्ट निश्चित करण्यात आले आहे. रिझर्व्ह बँकेचे आवश्यक निकष पूर्ण करून शेड्युल्ड बँकेचा दर्जा मिळवण्यासाठी नियोजनबद्ध प्रयत्न सुरू असल्याची घोषणा बँकेचे चेअरमन आमदार डॉ. अतुलबाबा भोसले यांनी केली.
आटके (ता. कराड) येथे कृष्णा सहकारी बँकेची ५५ वी वार्षिक सर्वसाधारण सभा अत्यंत खेळीमेळीच्या वातावरणात पार पडली. या प्रसंगी उपस्थितांना संबोधित करताना आ. डॉ. अतुलबाबा भोसले यांनी बँकेच्या भविष्यातील वाटचालीचा रोडमॅप मांडला.
आगामी उद्दिष्टे आणि विस्तार योजना:
व्यवसाय उद्दिष्ट: बँकेचा एकूण व्यवसाय २,००० कोटी रुपयांपर्यंत पोहोचवणे.
भांडवल पर्याप्तता प्रमाण (CRAR): सध्या बँकेचे भांडवल पर्याप्तता प्रमाण १८.०९ टक्के असून, ते २० टक्क्यांच्या पुढे नेण्यासाठी विशेष भर दिला जाईल.
नव्या शाखांची निर्मिती: पंढरपूर, चिपळूण, नवी मुंबई आणि आष्टा येथे लवकरच चार नवीन शाखा सुरू करण्यात येणार आहेत.
मल्टीस्टेट आणि शेड्युल्ड दर्जा: रिझर्व्ह बँकेकडे शेड्युल्ड बँकेच्या दर्जासाठी प्रस्ताव सादर केल्यानंतर बँकेचा मल्टीस्टेट स्तरावर विस्तार केला जाईल.
डिजिटल बँकिंग: ग्राहकांना घरबसल्या अत्याधुनिक बँकिंग सेवा मिळाव्यात यासाठी तंत्रज्ञानाचा वापर वाढवून मोबाइल अॅपमध्ये अधिक सुधारणा करण्यात आली आहे.
यावेळी यशवंतराव मोहिते कृष्णा सहकारी साखर कारखान्याचे चेअरमन डॉ. सुरेश भोसले यांनी, “शेतकरी, ग्रामीण अर्थव्यवस्था आणि रोजगारनिर्मिती यांना केंद्रस्थानी ठेवून बँकेने आपली प्रगती साधत राहावी,” असा सल्ला दिला.
सभेस कृष्णा कारखान्याचे व्हा. चेअरमन जे. डी. मोरे, बँकेचे व्हा. चेअरमन दामाजी मोरे, संचालक अरविंद पाटील, सुनील पाटील, पाटण अर्बन बँकेचे चेअरमन चंद्रकांत कापसे, संजय पवार, माजी जि. प. सदस्य शंकरराव खबाले यांच्यासह संचालक मंडळ, व्यवस्थापन समिती आणि सभासद मोठ्या संख्येने उपस्थित होते.
सभेचे प्रास्ताविक व स्वागत व्हा. चेअरमन दामाजी मोरे यांनी केले. मुख्य कार्यकारी अधिकारी भगवान जाधव यांनी बँकेचा वार्षिक अहवाल सादर केला, तर शिवाजीराव थोरात यांनी उपस्थितांचे आभार मानले.