पुणे: पुणे शहरात सायबर गुन्हेगारांनी पुन्हा एकदा आपले जाळे विणत नागरिकांना मोठ्या रकमेचा गंडा घातला आहे. शहराच्या विविध भागांत आठ वेगवेगळ्या प्रकरणांमध्ये नागरिकांची तब्बल १ कोटी ६९ लाख ७५ हजार ४४९ रुपयांची फसवणूक झाल्याचे समोर आले आहे. शेअर मार्केटमधील गुंतवणूक, इन्शुरन्सचे पैसे परत मिळवून देण्याचे आमिष आणि मनी लाँड्रिंगच्या नावाखाली ही फसवणूक करण्यात आली आहे. याप्रकरणी संबंधित पोलिस ठाण्यांत गुन्हे दाखल करण्यात आले आहेत.
सायबर गुन्हेगारांनी विविध प्रकारच्या क्लृप्त्या लढवून नागरिकांना लुटले आहे. त्यातील काही मुख्य प्रकरणे खालीलप्रमाणे आहेत:
शेअर मार्केटच्या नावाखाली गंडा: वाघोलीतील एका ४१ वर्षीय तक्रारदाराची १६ एप्रिल ते २६ ऑक्टोबर २०२५ या कालावधीत ५३ लाख ३० हजार १८० रुपयांची फसवणूक झाली. तसेच घोरपडी गावातील एका ४६ वर्षीय व्यक्तीलाही शेअर मार्केटमध्ये गुंतवणुकीच्या नावाखाली ४ लाख ५५ हजार ७५० रुपयांचा चुना लावण्यात आला आहे. तर खराडी येथील ७१ वर्षीय ज्येष्ठ नागरिकाची शेअर ट्रेडिंगच्या नावाखाली ६ लाख रुपयांची फसवणूक झाली आहे.
मनी लाँड्रिंगची भीती: सिंहगड रोड (आनंदनगर) येथील ३५ वर्षीय तक्रारदाराला 'तुमच्या खात्यातून मनी लाँड्रिंग झाले आहे', अशी भीती घालून तब्बल ३९ लाख रुपयांची फसवणूक केली. अशाच प्रकारे धानोरीतील एका ६५ वर्षीय ज्येष्ठ नागरिकालाही मनी लाँड्रिंगच्या नावाखाली ७ लाख २३ हजार रुपयांचा गंडा घालण्यात आला आहे.
इन्शुरन्स आणि टास्कच्या नावाखाली फसवणूक: धनकवडी येथील ५३ वर्षीय व्यक्तीला 'इन्शुरन्स कंपनीत अडकलेले पैसे परत मिळवून देतो' असे सांगून १८ लाख ३७ हजार ३५२ रुपयांची फसवणूक केली. तर लोहगाव येथील ६० वर्षीय महिलेला 'रिझर्व्हेशनचे टास्क पूर्ण करण्याच्या' बहाण्याने ३८ लाख ४४ हजार ५७० रुपयांना गंडवले.
इन्व्हेस्टमेंट खाते: विद्यापीठ हॉस्टेलमधील एका २८ वर्षीय तरुणाला इन्व्हेस्टमेंट खाते तयार करण्याच्या थापेला बळी पाडून २ लाख ५९ हजार रुपयांची फसवणूक केली.
या सर्व प्रकरणांत संबंधित पोलिस ठाण्यांत गुन्हे दाखल करण्यात आले आहेत. शहरात सायबर गुन्ह्यांचे प्रमाण वाढत असल्याने पोलिस प्रशासनाकडून नागरिकांना सतर्क राहण्याचे आवाहन करण्यात येत आहे. अनोळखी व्यक्तींच्या सांगण्यावरून कोणतीही आर्थिक व्यवहार किंवा खाजगी माहिती शेअर करू नका, असे पोलिसांचे म्हणणे आहे. या सर्व गुन्ह्यांचा तपास संबंधित पोलिस ठाण्यांचे निरीक्षक करत आहेत.
नागरिकांसाठी महत्त्वाची टीप:
शेअर मार्केटमध्ये गुंतवणूक करताना अधिकृत ॲप्सचाच वापर करा.
पोलिस किंवा बँकेच्या नावाने फोन आल्यास घाबरून न जाता प्रत्यक्ष बँकेत जाऊन चौकशी करा.
'वर्क फ्रॉम होम' किंवा 'टास्क पूर्ण करणे' यांसारख्या आमिषांना बळी पडू नका.
फसवणूक झाल्याचा संशय येताच तात्काळ १९३० (Cyber Crime Helpline) या क्रमांकावर संपर्क साधा.