नागपूर: लाईफ लाईन महिला नागरी सहकारी पत संस्था मर्यादित, नागपूर येथे दिवाळी निमित्त दीपोत्सव कार्यक्रम यशस्वीरीत्या पार पडला. या कार्यक्रमाचा उद्देश शगुन ठेव योजना सप्ताह साजरा करणे आणि सभासद, अधिकारी कर्मचारी व अभिकर्त्यांच्या सहकार्याने ठेवीस प्रोत्साहन देणे हा होता. या प्रयत्नांमुळे ५१ लाख रुपयांचे ठेवी जमा करण्यात आल्या .
कार्यक्रमात विविध सत्रांचे आयोजन करण्यात आले. देशी-विदेशी पर्यटन आणि योग विषयक मार्गदर्शन प्रा. पवार सर यांनी केले. व्यवसाय वृद्धी आणि नियोजनाविषयी विकास अधिकारी श्रावण श्रावणकर यांनी सहभागींसाठी उपयोगी टिप्स दिल्या. तसेच, अभिकर्ता देवेंद्र भाजीपाले यांनी अल्पावधीत प्रतिमाह ४० हजार रुपयांचे उत्पन्न कसे मिळवता येते, याबाबत प्रत्यक्ष अनुभव सादर केले.
संस्थेच्या ब्रीद वाक्याप्रमाणे जीवन जगण्याची दिशा बदलण्यासाठी ठेवीदार, कर्जदार, कर्मचारी व अभिकर्त्यांनी आपले मनोगत व्यक्त केले, ज्यात रोजगार, आर्थिक साक्षरता आणि आर्थिक स्वतंत्रतेसंबंधी अनुभव सामायिक केले.
व्यवस्थापकीय संचालक डॉ. नागेश्वर मदनकर यांनी पुढील २०२५-२६ सत्राचे दृष्टिकोन सादर केले आणि संस्थेच्या योजनांवर प्रकाश टाकला. कार्यक्रमात उपाध्यक्ष सौ. विजया श्रावणकर यांनी दिवाळीनिमित्त सहभाग आणि सहकार्याबद्दल सर्वांचे आभार मानले.
कार्यक्रमाचा शेवट दीपोत्सवाच्या मंगलमय वातावरणात साजरा करून करण्यात आला, ज्यामुळे सहभागींमध्ये उत्साह आणि आनंदाचा अनुभव निर्माण झाला.