महाराष्ट्रातील सहकारी बँकांत अग्रगण्य असलेल्या डोंबिवली नागरी सहकारी (DNS) बँकेने आपले अधिकृत यूपीआय हँडल @okdnsbank कार्यान्वित करून डिजिटल बँकिंग क्षेत्रात आणखी एक महत्त्वाचे पाऊल टाकले आहे. त्यामुळे यूपीआय सेवा देणाऱ्या काही निवडक सहकारी बँकांमध्ये या बँकेचे स्थान अधोरेखित झाले आहे.
डीएनएस बँकेने डिजिटल परिवर्तन आणि वित्तीय समावेशकतेच्या दिशेने टाकलेले हे पाऊल बँकेच्या नाविन्यपूर्ण दृष्टीकोनाचे उत्तम उदाहरण मानले जात आहे. या उपक्रमाद्वारे बँकेने सहकारी क्षेत्रातील डिजिटल पेमेंटच्या विकासाला नवे बळ दिले असून, ग्राहकांना अधिक सुरक्षित, सोयीस्कर आणि जलद व्यवहारांचा अनुभव देण्याचा सक्षम प्रयत्न केला आहे.
ग्लोबल फिनटेक फेस्टिव्हल २०२५ या नुकत्याच संपन्न झालेल्या भव्य सोहळ्यात डीएनएस बँकेचे संचालक मंडळ, पदाधिकारी आणि वरिष्ठ अधिकाऱ्यांच्या उपस्थितीत या यूपीआय हँडलचे अनावरण करण्यात आले. कार्यक्रमादरम्यान उपस्थित पाहुण्यांनी या उपक्रमाचे स्वागत करत बँकेच्या प्रगतीशील विचारसरणीचे कौतुक केले.
या प्रसंगी बोलताना बँकेचे संचालक मिलिंद आरोलकर म्हणाले, “डीएनएस बँक आणि एकूणच सहकारी बँकिंग क्षेत्रासाठी हा एक परिवर्तनाचा क्षण आहे. आमचे उद्दिष्ट प्रत्येक समुदायापर्यंत सुरक्षित, आधुनिक आणि सर्वसमावेशक डिजिटल बँकिंग सेवा पोहोचवणे आहे. हे यूपीआय हँडल त्या प्रवासातील एक महत्त्वाचा टप्पा आहे.”
डीएनएस बँकेने इतर सहकारी बँकांना देखील त्यांच्या अधिकृत यूपीआय हँडल अंतर्गत सहकार्य करण्याचे आणि क्यूआर-आधारित पेमेंट सोल्यूशन्स स्वीकारण्याचे आवाहन केले आहे. या सहकार्यामुळे सहकारी क्षेत्रात एक एकीकृत आणि सुरक्षित डिजिटल पेमेंट इकोसिस्टम निर्माण होईल, ज्यामुळे ग्रामीण आणि शहरी दोन्ही भागांतील व्यवहार अधिक पारदर्शक आणि सोपे होतील.
डीएनएस बँकेचा हा उपक्रम केवळ डिजिटल सक्षमीकरणाचाच नव्हे, तर सहकारी क्षेत्रातील परस्पर सहकार्य आणि तांत्रिक प्रगतीचा दिशादर्शक ठरतो. या माध्यमातून बँकिंग सेवा अधिक लोकाभिमुख होऊन सहकारी संस्थांना नव्या तंत्रज्ञानाशी जोडण्यासाठी यामुळे निश्चित दिशा मिळणार आहे.